आर्थिक वर्ष २०८०/८१ मा लागुऔषध नियन्त्रण ब्युरोले ८१४ मुद्दा दर्ता गरेकोमा २०८१/८२ मा यो संख्या बढेर १ हजार १३२ पुगेको छ । चालु आर्थिक वर्षमा हालसम्म ८३७ मुद्दा दर्ता भइसकेका छन् । विदेशी नागरिकको संलग्नता पनि बढ्दो रहेको प्रहरीले जनाएको छ ।

लागुऔषध नियन्त्रण ब्युरोले आगामी तीन वर्ष (२०८३–२०८६) का लागि एकीकृत नार्कोटिक इन्टेलिजेन्स म्यानेजमेन्ट सिस्टम लागू गर्ने योजना बनाएको छ । साथै ७७ वटै जिल्लामा सर्वेक्षण गरी जोखिम क्षेत्र पहिचान गर्ने र इन्टेलिजेन्स–लेड पोलिसिङमार्फत नियन्त्रण गर्ने रणनीति लिइएको छ ।

लागुऔषधलाई संगठित अपराध र सम्पत्ति शुद्धीकरणसँग जोडेर अनुसन्धान गर्ने, अन्तर्राष्ट्रिय सञ्जाल तोड्ने, विमानस्थल तथा नाकामा निगरानी कडा गर्ने योजना पनि समेटिएको छ । गाँजा, चरेस, हेरोइन, कोकिन तथा अन्य सेमि–सिन्थेटिक ड्रग्सको कारोबार नियन्त्रणमा विशेष ध्यान दिइनेछ ।

प्रहरीले लागुऔषध ऐन संशोधन, अवैध खेती नियन्त्रण, र दुर्व्यसन न्यूनीकरणका लागि विद्यालयदेखि स्थानीय तहसम्म सचेतना कार्यक्रम सञ्चालन गर्ने जनाएको छ ।

प्रविधि, जनशक्ति र बजेट अभावबीच पनि यो कार्ययोजनाले आगामी तीन वर्षभित्र लागुऔषध कारोबार र प्रयोगमा उल्लेख्य कमी ल्याउने अपेक्षा गरिएको छ ।

बारा, ४ असार । जिल्ला प्रहरी कार्यालय बारा र इलाका प्रहरी कार्यालय सिमराको संयुक्त टोलीले २२ किलो गाँजासहित एक जनालाई पक्राउ गरेको छ। पक्राउ पर्ने व्यक्ति जीतपुर सिमरा उपमहानगरपालिका–८ लोसण्डा निवासी ४५ वर्षीय रामपुकार सहनी रहेको प्रहरीको भनाइ छ।

प्रहरीका अनुसार सहनीलाई ईम्लिप्रति क्षेत्रको खेतमा दुई वटा बोरामा गाँजा बोकेर हिँडिरहेको अवस्थामा विशेष सूचनाको आधारमा मंगलबार साँझ पक्राउ गरिएको हो।

प्रहरीले उनलाई लागुऔषध सम्बन्धी मुद्दामा कारबाही प्रक्रिया अघि बढाइएको जानकारी दिएको छ। यस घटनाले सीमावर्ती क्षेत्रहरूमा लागूऔषध तस्करीको बढ्दो जोखिमप्रति सचेत रहनुपर्ने सन्देश दिएको छ।

रौतहट , ३१ जेठ । नेपाल–भारत सीमा संयुक्त समन्वय समितिको नियमित बैठक शुक्रबार साँझ सर्लाहीको हरिवनमा सम्पन्न भएको छ। बैठकमा सीमाक्षेत्रमा हुने आपराधिक क्रियाकलाप, लागुऔषध, अवैध हातहतियार कारोबार, तथा मदिराजन्य पदार्थको तस्करी नियन्त्रणमा शून्य सहनशीलता अपनाउने सहमति गरिएको छ।

बैठक सर्लाहीका प्रमुख जिल्ला अधिकारी (सीडीओ) तुलसी बहादुर श्रेष्ठको अध्यक्षतामा सम्पन्न भएको हो। बैठकमा सहभागी रौतहटका सीडीओ विनोद कुमार खडकाका अनुसार, एक देशमा अपराध गरी अर्को देशमा लुकेका अपराधीमाथि सूचनाको आदानप्रदान र प्रत्यक्ष सहयोग गर्दै नियन्त्रण गरिने निर्णय गरिएको छ।

साथै, विदेशी घुसपैठ नियन्त्रण, दशगजा र सीमाक्षेत्रको सुरक्षा निगरानीमा कडाइ गरिने विषयमा विशेष जोड दिइएको छ। बैठकमा वर्षायाममा रौतहटस्थित बागमती र लालबकैया नदीमा जलस्तर बढ्ने बेला गौर क्षेत्र डुबानमा पर्ने खतरा रोक्न भारतको बैरगनिया साईफन (ढोका) खोल्न सहमति भएको पनि जानकारी दिइएको छ।

दुईपक्षीय बैठकमा सर्लाही, महोत्तरी, रौतहट र भारतको बिहार अन्तर्गत सितामढी जिल्लाका सुरक्षा अधिकारीहरूको उपस्थिति रहेको जिल्ला प्रशासन कार्यालय रौतहटले जनाएको छ।