पहिरोले लियो आमा–छोराको ज्यान

२३ साउन २०७७ बैतडी । पहिरोमा पुरिएर दुई जनाको मृत्यु भएको छ । डिलाशैनी गाउँपालिका–४ बलालीका ४० वर्षीया पशुपति बोहरा र उनीका १२ वर्षीय छोरा रिकेशको ज्यान गएको जिल्ला प्रहरी कार्यालयले जनाएको छ ।

बिहीबार राति १२ बजेतिर पहिरो खस्दा घरभित्रै सुतिरहेका आमाछोराको मृत्यु भएको प्रवक्ता प्रहरी निरीक्षक किसन चन्दले बताए । १६ वर्षीया सुजिता बोहरा र १२ वर्षीया सुनिता बोहराले भने भागेर ज्यान जोगाएका छन् । घरमाथिबाट खसेको पहिरोले घर पूर्णरूपमा पुरेको स्थानीयले बताएका छन् ।

घरभित्र पुरिएका दुवै जनाको शव निकालेर परीक्षणका लागि गोकुलेश्वर अस्पताल ल्याइन लागेको प्रहरीले जनाएको छ । घरमाथिबाट पहिरो खस्दा गोठमा बाँधेका गाईगोरुलाई समेत चोट लागेको छ ।पशुपतिका श्रीमान् रोजगारीका लागि भारतको पिथौरगढमा रहेका छन् ।