पहिरो पीडितको घर सरकारले बनाइदिने

२ साउन २०७७ हेटौंडा । सिन्धुपाल्चोकमा पहिरोका कारण क्षति भएका घर प्रदेश सरकारले बनाइदिने भएको छ ।स्थानीय तहले उपलब्ध गराउने जग्गामा प्रदेश सरकारले पीडितहरुका लागि घर निर्माण गरिदिने भएको हो ।

बागमती बिपद ब्यबस्थापन निर्देशक समितिको बैठकले यस्तो निर्णय गरेको हो । समितिका अध्यक्ष प्रदेशका मुख्यमन्त्री डोरमणि पौडेलको अध्यक्षतामा बसेको बैठकले स्थानीय तहमार्फत राहत उपलब्ध गराउन लागेको बताए । बारबिसे नगरपालिकामा ३० लाख, भोटेकोशी गाउँपालिकामा १५ लाख र जुगल गाउँपालिकामा १० लाख राहत रकम उपलब्ध गराउने पौडेलले बताए ।

मृतकका परिवारलाई राहत रकम १ लाख रुपैयाँ पनि तत्काल उपलब्ध गराईने निर्णय भएको जनाइएको छ । समितिमा ३ जना प्रदेश सभा सदस्यलाई मनोनित गरिएको छ । समितिमा राजेन्द्रमान श्रेष्ठ, छिरिङ दोर्जे लामा र ईन्द्रमाया गुरुङ मनोनित गरिएको आन्तरिक मामिला तथा कानुनमन्त्री शालिकाराम जम्कट्टेलले बताए ।