- २९ श्रावण २०८३, शुक्रबार / Aug 14, 2026
काठमाण्डौ । मेडिकल पर्शन वा व्यापारीले मास्क (मुखावरण) लुकाएको वा महँगोमा बेचेको पाइएमा तुरुन्त ११३७ नम्बरमा फोन गर्न सरकारले आग्रह गरेको छ । बजारमा मास्क नपाइने र पाइए पनि महँगो पर्ने गुनासो निकै बढेपछि पैसा नलाग्ने फोन नम्बर ११३७ मा खबर गर्न वा वाणिज्य आपूर्ति तथा उपभोक्ता हित संरक्षण विभागमा जानकारी गराउन आग्रह गरिएको छ ।
त्यस्तो भेटिए वा उजुरीको आधारमा अनुगमन गरी दोषी पाइए तीन लाख रुपैयाँसम्म जरिबाना गर्ने र मुद्दा चलाउने विभागका महानिर्देशक नेत्रप्रसाद सुवेदीले बताए । बजारमा अनुगममा मास्क लुकाएको वा बढी मूल्यमा बेचेको पाइए कारबाही गर्न थालिसकिएको उनले जानकारी दिए । मास्क लुकाए र महंगोमा बेचेको भन्दै काठमाडौंको क्षेत्रपाटीमा रहेको नेपाल केयर सर्जिकल सप्लायर्सलाई दुई लाख रुपैयाँ जरिबाना तिराएको विभागले जानकारी दिएको छ ।
बिलबिना नै महँगोमा मास्क बेच्ने त्रिपुरेश्वरको स्वस्तिक सर्जिकल सप्लायर्सलाई पनि २० हजार, सचिन ट्रेड कन्सर्न, त्रिपुरेश्वरको खनाल सर्जरी सप्लायर्स, अर्चना सर्जिकल र फिस्टेल सर्जिकललाई जरिबाना तिराएको महानिर्देशक सुवेदीले बताए । विभागले बजार अनुगमनलाई पनि तीब्रता दिईरहेको छ । यता कच्चा पदार्थ आपूर्तिमा सम्भावित अभाव हुन नदिन सरकारले सम्बन्धित निकायसँग छलफल गर्ने जनाएको छ ।
