- ३० भाद्र २०८३, मंगलवार / Sep 15, 2026
काठमाडौं, ४ जेठ । गाजाको ‘सुरक्षित क्षेत्र’ मानिएको अल–मावासी क्षेत्रमा इजरायली सेनाले गरेको आक्रमणमा कम्तीमा ३६ जनाको मृत्यु भएको अन्तर्राष्ट्रिय समाचार संस्था अलजजिराले जनाएको छ। इजरायली सेनाले गाजामा बमबारी जारी राख्दै गर्दा यो आक्रमण भएको हो।
पछिल्लो समय इजरायलले स्थल आक्रमणको तयारी तीव्र बनाउँदै गाजाका विभिन्न भागमा सशस्त्र गतिविधि विस्तार गरिरहेको छ। इजरायलको यो आक्रमण कतारमा हमाससँग युद्धविराम वार्ता चलिरहेका बेला भएको हो। एकातिर कूटनीतिक पहल जारी रहेका बेला अर्कोतर्फ सैन्य आक्रमण बढाइँदा युद्ध अन्त्यको प्रयासप्रति प्रश्न उठेको छ।
यसैबीच, इराकको राजधानी बग्दादमा भेला भएका अरब देशका नेताहरूले गाजामा युद्ध तत्काल अन्त्य गर्न माग गरेका छन्। उनीहरूले मानवीय सहायता अवरुद्ध नहुने व्यवस्था मिलाउन अन्तर्राष्ट्रिय समुदायसँग अपिल गरेका छन्।
गाजाको स्वास्थ्य मन्त्रालयका अनुसार इजरायली आक्रमणमा अहिलेसम्म ५३ हजार २७२ जना प्यालेस्टिनी नागरिकको मृत्यु भएको छ भने १ लाख २० हजार ६७३ जना घाइते भएका छन्। सरकारी सञ्चार कार्यालयले भने मृत्यु सङ्ख्या ६१ हजार ७०० भन्दा बढी पुगेको दाबी गर्दै अझै हजारौं मानिस भग्नावशेषमा बेपत्ता रहेको जानकारी दिएको छ।
इजरायली पक्षको भनाइ अनुसार, सन् २०२३ को अक्टोबर ७ मा हमासले इजरायलमा गरेको आक्रमणमा १ हजार १३९ जना इजरायलीको मृत्यु भएको थियो भने २०० भन्दा बढी व्यक्तिहरू अपहरणमा परेका थिए। दुवै पक्षको आक्रोश, मानवीय संकट र राजनीतिक दबाबबीच गाजा युद्ध अझै अनिश्चित दिशातर्फ उन्मुख देखिएको छ।
