- २० जेष्ठ २०८३, बुधबार / Jun 3, 2026
काठमाडौं, १९ चैत । राष्ट्रिय स्वतन्त्र पार्टी (रास्वपा) का सभापति रवि लामिछानेले सभामुख देवराज घिमिरेसँग भेट गरी आफ्नो सांसद पद निलम्बन फुकुवाको माग गरेका छन्। मंगलबार बिहान भएको भेटमा उनले यो अनुरोध गरेका हुन्।
यसअघि माघ १८ गते पनि लामिछानेले सभामुखसँग भेटेर सांसद पद निलम्बन हटाउन आग्रह गरेका थिए। मंगलबार फेरि सभामुखसँगको भेटमा उनले सोही माग दोहोर्याएका छन्।
लामिछाने गत पुस ८ गते सांसद पदबाट निलम्बनमा परेका थिए। गत कात्तिक २ गते उनी पक्राउ परेका थिए भने सहकारी ठगी, संगठित अपराध र सम्पत्ति शुद्धीकरणको अभियोगमा मुद्दा दर्ता भएपछि उनको सांसद पद निलम्बन भएको थियो।
रास्वपाले सभामुखले लामिछानेको निलम्बनमा विवेकपूर्ण निर्णय नगरेको भन्दै आलोचना गर्दै आएको छ। तर, संसद् सचिवालयले कास्की जिल्ला प्रहरी कार्यालयको पत्रलाई आधार मानेर निलम्बन गरिएको जनाउँदै आएको छ।
कास्की जिल्ला प्रहरीले लामिछानेविरुद्ध सहकारी ठगी, संगठित अपराध र सम्पत्ति शुद्धीकरणको अभियोगमा कास्की जिल्ला अदालतमा मुद्दा दर्ता भएको जानकारी संसद् सचिवालयलाई पठाएको थियो। सोही पत्रका आधारमा सचिवालयले उनको सांसद पद निलम्बनमा राखेको हो।
रास्वपाका नेताहरूले भने कास्की प्रहरीको पत्रलाई मात्र आधार बनाएर लामिछानेको सांसद पद निलम्बन गर्न नहुने दाबी गर्दै आएका छन्।
