- २७ असार २०८३, शनिबार / Jul 11, 2026
चितवन, ०६ असार । राष्ट्रिय स्वतन्त्र पार्टी (रास्वपा) को प्रथम महाधिवेशनका लागि निर्माण गरिएको रास्वपाको स्वागत गेट का कारण अड्किएका ५ वटा भारतीय ट्रकलाई गेट हटाएर गन्तव्यतर्फ पठाइएको छ ।
शनिबार दिउँसो करिब २ बजेतिर पूर्वी चितवनको टिकौली जंगल क्षेत्रमा आइपुगेका ती ट्रक रास्वपाको स्वागत गेट को उचाइका कारण अगाडि बढ्न नसकेपछि निपनी क्षेत्रमा रातभर रोकिएका थिए । आज बिहान स्वयंसेवक र प्रहरीको समन्वयमा गेट हटाएर ट्रकलाई पार गराइएको हो । ट्रकहरू गन्तव्यतर्फ पठाएपछि गेट पुनः यथास्थानमा राखिएको बताइएको छ ।
सुरुमा ट्रकहरूलाई तीन दिनसम्म निपनीमै बस्न भनिएको थियो । तर पछि आवश्यक समन्वय गरेर गेट हटाइएपछि ट्रकहरूलाई मार्ग खुला गरिएको हो ।
ट्रक चालकका अनुसार ती सवारी साधनले कुरिनटारस्थित बाह्रसिङ्गे वियरका लागि सामग्री बोकेर आएका थिए । रास्वपाको महाधिवेशनमा सहभागी प्रतिनिधि तथा आगन्तुकहरूको स्वागतका लागि भरतपुरका विभिन्न स्थानमा रास्वपाको स्वागत गेट निर्माण गरिएको छ । तर गेटको उचाइभन्दा अग्ला ट्रक आउँदा आवागमनमा समस्या उत्पन्न भएको थियो ।
