- ३१ असार २०८३, बुधबार / Jul 15, 2026
काठमाडौँ, २५ चैत । राष्ट्रिय प्रजातन्त्र पार्टी (राप्रपा) ले संवैधानिक राजतन्त्र र हिन्दु राज्य पुनर्स्थापनाको मागलाई लिएर मंगलबार काठमाडौँमा आयोजना गर्न लागेको प्रदर्शन र सभाको सम्पूर्ण तयारी पूरा भएको जनाएको छ।
राप्रपाका प्रवक्ता मोहन श्रेष्ठका अनुसार सभामा पार्टी अध्यक्ष राजेन्द्र लिङ्देनसहितका शीर्ष नेताहरूले सम्बोधन गर्नेछन्। सभा अघि काठमाडौँका विभिन्न स्थानबाट जुलुसहरू निकालिने र ती जुलुस सभास्थलमा पुगेर सभामा परिणत हुनेछन् । याे प्रदर्शन र सभा पूर्ण रूपमा शान्तिपूर्ण हुने राष्ट्रिय प्रजातन्त्र पार्टी (राप्रपा) ले जनाएकाे छ ।
यसअघि चैत १५ गते राप्रपाको समर्थन र सहभागितामा काठमाडौँको तीनकुनेमा आयोजित सभा हिंसात्मक बनेको थियो । संवैधानिक राजतन्त्र र हिन्दु राज्य पुनर्स्थापनाको माग राख्दै दुर्गा प्रसाईंको नेतृत्वमा भएको उक्त प्रदर्शनमा झडप हुँदा दुई जनाको मृत्यु भएको थियो भने अर्बौँको भौतिक क्षति भएको भएकाे छ। घटनापछि राप्रपाले हिंसाको दोष सरकारमाथि लगाएको थियो । तर, प्रहरीले हिंसा भड्काएको आरोपमा राप्रपाका वरिष्ठ उपाध्यक्ष रविन्द्र मिश्र, महामन्त्री धवलशमशेर राणासहितका नेतालाई पक्राउ गरेको छ।
चैत २६ को सभालाई राजसंस्था पुनर्स्थापनाका लागि गठित ‘संयुक्त जनआन्दोलन समिति’ का कार्यवाहक संयोजक डा. जगमान गुरुङले पनि समर्थन जनाएका छन् । उनले शान्तिपूर्ण रूपमा सहभागी हुन सबै राष्ट्रवादी नागरिकलाई आह्वानसमेत गरेका छन् । राप्रपाले यो सभालाई आफ्नो सरकारप्रति दबाब बढाउने अवसरका रूपमा लिएको छ ।
