- २६ असार २०८३, शुक्रबार / Jul 10, 2026
३ जेठ २०७७ काठमाडौं । कोरोना भाइरसकै संक्रमणका कारण मृत्यु भएमा उक्त व्यक्तिको परिवार तथा आफन्तले मृतकको शव छुन नपाउने भएका छन् ।
छुन त परकाे कुरा हेर्न पनि एक मिटरकाे दुरी कायम राखेर परबाट मात्रै हेर्न पाउनेछन् । स्वास्थ्य तथा जनसंख्या मन्त्रालयले बनाएको शव व्यवस्थापनसम्बन्धी कार्यविधिले यस्तो व्यवस्था गरेकाे छ ।
व्यक्तिको धर्मअनुसार परिवारले नछोइकन अन्त्येष्टि गर्न पाउने व्यवस्था भने गरिएकाे छ । काेराेना संक्रमणबाट मृत्यु भएका व्यक्तिको शव व्यवस्थापनमा विशेष सावधानी अपनाउनुपर्ने भएकाले यस्ताे व्यवस्था गरिएकाे हाे ।
६० वर्षभन्दा माथि र दीर्घरोगी बिरामीले भने शवको नजिक जानसमेत रोक लगाइएकाे छ । शवको सदगद गर्दा विशेष सवाधानी सहित अन्तिम संस्कार गर्न लैजाने क्रममा अस्पतालका कर्मचारी, एम्बुलेन्सका कर्मचारी, सदगद गर्ने व्यक्तिहरु र सहभागीले पिपिई अनिवार्य प्रयोग गर्नुपर्ने छ ।
सामान्यता पोष्टमार्टम गर्न नपर्ने र गर्नै परे मृतकको फोक्सो तथा अन्य अंगहरुमा जीवाणु जिउँदै हुन सक्ने भएकाले विशेष होसियारी अपनाउन समेत विज्ञहरुले बताएका छन् ।
