पोखरीमा राखेका गमला फुटाउने दुईजना प्रहरीको नियन्त्रणमा

भक्तपुर । केहि समय पहिले दरवार क्षेत्र, दत्तात्रय र नःपुखु क्षेत्रमा राखिएका आकर्षक गमलाहरु फुटाउने दुई जना उच्छृङ्खल व्यक्तिहरुलाई प्रहरीले नियन्त्रणमा लगेको छ । पक्राउ पर्नेमा भक्तपुर नगरपालिका वडा नं. ७ का रिजन लागे र वडा नं. १० का रमेश सुवाल रहेको महानगरीय प्रहरी परिसरका प्रहरी उपरीक्षक सविन प्रधानले बताए ।

पछिल्लो समय (राति ११ बजेर ४० मिनेटको समय)मा ती व्यक्तिहरुले मादक पदार्थ सेवन गरी अपशव्द प्रयोग गर्दै गमला फुटाएको सीसी क्यामेरा फुटेजको आधारमा प्रहरीले पक्राउ गरेको हो । उच्छृङ्खल गतिविधिमा संलग्न ती व्यक्तिलाई नगरपालिकाले कार्वाहीको दायरामा समेत ल्याएको भक्तपुर नगरले बताएको छ ।

आफ्ना सन्ततिबाट गल्ती भएको स्वीकार गर्दै परिवारले सन्तानहरुको गलत व्यवहार सच्याउन आफूहरु कटिवद्ध रहेको र अब त्यस्ता गतिविधिमा संलग्न हुनै नदिने वचन बद्धता समेत गरेका छन् । नगरपालिकाले नगरको सम्पदा क्षेत्रमा हरियाली व्यवस्थापन गर्ने उद्देश्यले दरवार क्षेत्र, दत्तात्रय, नःपुखुलगायतका विभिन्न स्थानमा विरुवासहित गमलाहरु राखेको थियो ।

पोखरी र सम्पदाको आकर्षणका लागि गमला राखेपछि स्थानीय वासिन्दा तथा पर्यटकहरु खुसी हुदै नगरको सकारात्मक कार्यप्रति धन्यवाद समेत दिएका थिए । सम्पदा क्षेत्रमा हरियाली देख्न पाउँदा खुशी लागेको भन्दै स्थानीयले पुरानो नगरको उपयुक्त स्थानमा सानै भए पनि बगैंचा बनाउनु पर्ने र केही पिच सडकको दायाँबायाँ पेटीमा वृक्षारोपण गर्नुपर्ने सुझाव दिएका थिए ।