- ३० फाल्गुन २०८२, शनिबार / Mar 14, 2026
काठमाडौं । अख्तियार दुरुपयोग अनुसन्धान आयोगले मालपोत कार्यालय चावहिलका कार्यालय सहयोगी राजेन्द्र बस्नेतविरुद्ध अकुत सम्पत्ति आर्जनमा मुद्दा दयार गरेको छ । हाल निलम्बित उनले ८ करोड ९८ लाख ५८ हजार अवैध रुपमा सम्पत्ति आर्जन गरेको कसुरमा बिहीबार विशेष अदालतमा मुद्दा दायर गरिएको अख्तियार दुरुपयोग अनुसन्धान आयोगले जनाएको छ।
कार्यालय सहयोगी बस्नेतले ३० वर्षे जागिर जीवनमा यति धेरै सम्पत्ति आर्जन गरेका हुन् । पदीय दुरुपयोग गरी गैरकानूनी रुपमा सम्पत्ति आर्जन गरी अस्वाभाविक उच्च जीवनयापन गरिरहेको भन्ने उजूरीपछि अख्तियारले उनीविरुद्ध अनुसन्धान गरेको हो ।
बस्नेतकी श्रीमती सीता बस्नेत¸ आमा टुकुकुमारी बस्नेत र भतिजा कृपा बस्नेतलाई पनि अख्तियारले प्रतिवादी बनाएको छ । बस्नेतविरुद्ध दुई वर्षसम्म कैद र बिगो बमोजिम जरिबाना गरी त्यसरी आर्जन गरेको गैरकानुनी सम्पत्तिसमेत जफतको माग गरिएको छ।
