नेपालमा अहिलेसम्म ६ जनामा कोरोना संक्रमण

काठमाडौं । नेपालको छैटौं कोरोना भाइरस संक्रमित बागलुङकी ६५ वर्षीया वृद्धा देखिएको छ । स्वास्थ्य तथा जनसंख्या मन्त्रालयका प्रवक्ता डा. विकास देवकोटाले संक्रमणको नतिजा पोजेटिभ आएको पुष्टि गरे । चैत ४ गते बेल्जियमबाट कतारको दोहा हुँदै कतार एयरवेजको विमान क्युआर ६५२ बाट नेपाल आएकी उनीसंगै तेस्रो संक्रमित बागलुङकै १९ वर्षीया किशोरी उनकै आफन्त हुन् ।

दुबै बेल्जियमबाटसँगै नेपाल आएका हुन् । काठमाडौंबाट यती एयरलाइन्सको विमानबाट पोखरा पुगेका उनीहरु एकदिन आफन्तकहाँ बसेर जिपमा बाग्लुङ पुगेका थिए । सँगै आएकी किशोरीमा संक्रमण देखिएपछि क्वारेन्टाइनमा बसेकी उनमा दमको समस्या रहेको बागलुङ अस्पताल स्रोतले बतायो ।

नेपालमा अहिलेसम्म ६ जनामा कोरोना संक्रमण देखिएको छ । ती संक्रमित सबै विदेशबाट आएका हुन् । त्यसमा पनि दोस्रो, तेस्रो र छैटौं संक्रमित चैत ४ गते दोहाबाट कतार एयरवेजको एउटै विमानमा आएका थिए ।