- २६ असार २०८३, शुक्रबार / Jul 10, 2026
१३ बैशाख २०७७ काठमाडौं । विश्व स्वास्थ्य संगठन (डब्लुएचओ) ले नेपाललाई अति उच्च जोखिमको सूची (लेभल ४)बाट हटाएर उच्च जोखिमको सूची (लेभल ३)मा झारेको छ । नेपालको सक्रियता र नतिजाको आधारमा जोखिम सूचीमा सुधार भएको स्वास्थ्य सेवा विभागले जनाएको छ ।
लेभल ४ बाट हटाएर लेभल ३ मा झारेको भन्दै विभागका महानिर्देशक महेन्द्रप्रसाद श्रेष्ठले भने, ‘हामी पहिले लेभल ४ अर्थात अति उच्च जोखिमको सूचीमा थियौँ । तर त्यसलाई हामीले सुधार गर्यौँ, अहिले लेभल ३ मा झरेका छौँ ।’
भारत, श्रीलंका, बंगलादेश, भुटान, मालदिव्स लेभल ३ मा रहेको भन्दै उनले पाकिस्तान अहिले पनि लेभल ४ र अफगानिस्तान लेभल ५ मा नै रहेको श्रेष्ठले बताए ।
पछिल्लो समय नेपालले पीसीआर र र्यापिड टेष्टको दायरा बढाएको, लकडाउनलाई कडाईका साथ लागू गरेको, आइसोलेसन वार्ड बढाएको, स्थानीय तहले कडाईका साथ नियमको पालना गरेको कार्यको मूल्यांकन गरी नेपालको अवस्थामा सुधार भएको महानिर्देशक श्रेष्ठले बताए ।
कोरोना नियन्त्रणका लागि नेपालले चालेको कदम विश्वमै उत्कृष्ठ रहेको भन्दै सातवटै प्रदेशमा तिब्रगतिमा प्रयोगशाला विस्तार, संघ प्रदेश र स्थानीय तहको अभुतपूर्व कार्यले कोरोनाको सम्भावित भयावह अवस्था हुनबाट जोगाउन सफल भएको उनको भनाई छ ।
डव्लुएचओले नेपालको कोरोना नियन्त्रण सम्वन्धी कदमलाई सही दिशामा अघि बढीरहेको उल्लेख गरेको जानकारी दिदै नेपालमा कोरोनाबाट ४९ जना संक्रमित भएको र ११ जना निको भएर घर फर्किसकेका बताए ।
