- ३१ असार २०८३, बुधबार / Jul 15, 2026
काठमाडौं । सरकारले कोरोना भाइरसका बारेमा जनचेतना फैलाउन देशभर स्वास्थ्यकर्मी सहितको स्वयंसेवक परिचालन गर्ने भएको छ ।
राष्ट्रिय चिकित्सा शिक्षा आयोगका उपाध्यक्ष प्रा. डा. श्रीकृष्ण गिरीको संयोजकत्वमा देशभर कोरोना भाइरसका बारेमा जनचेतना फैलाउन स्वास्थ्यकर्मीसहितको स्वयंसेवक परिचालन समिति गठन गरेको हो ।
डा. गिरीको संयोजकत्वमा स्वास्थ्य मन्त्रालयका प्रमुख विशेषज्ञ डा. रोशन पोखरेल, सहसचिव डा. गुणराज लोहनी र शिक्षा मन्त्रालयका सहसचिव दीपक शर्मा गरी चार सदस्य छन् ।
हरेक वडामा हरेक दिन कम्तिमा २ देखि ५ जनाको समूह बनाई घर घरमा गएर कोरोनाको बारेमा सचेतना कार्यक्रम शुक्रबारबाट सञ्चालन गर्ने तयारी भएको डा. गिरीले जानकारी दिएका छन् ।
मेडिकल क्षेत्रका विद्यार्थी, रेडक्रस, स्काउट र पत्रकार लगायतलाई स्वयंसेवक खटाउन लागिएको उनले बताएका छन् ।
