भाइरसको महामारीपछि चीनका विद्यालय खुल्न थाले

गत वर्षको अन्तमा भाइरस सुरु भएको वुहानमा मे महिनाको ६ तारेखदेखि विद्यालय खुलाउने तयारी गरिदैछ ।

चीनले कोरोना भाइरसको संक्रमण धेरै हदसम्म नियन्त्रणमा आएको बताएको छ । चीनमा गत शुक्रबारदेखि जम्मा २६ जना संक्रमितमात्र थपिएका छन् । चीनमा अहिलेसम्म ८२ हजार ८ सय ३० जनामा कोरोना संक्रमण पुष्टि भएको छ ।

कोरोनाको इपीसेन्टर वुहान सहरका सबै कोरोना संक्रमित बिरामी अस्पतालबाट उपचार पछि घर फर्कि सकेकाछन् । तर त्यहाँ संक्रमण फेरि फैलिन सक्ने सम्भावना रहेको भन्दै भौतिक दूरी कायम राख्ने उपायहरु कडाइपूर्वक पालना गरिएको छ ।

विद्यालयमा विद्यार्थीलाई मास्क अनिवार्य गरिएको छ भने कक्षाकोठामा बस्न निश्चित दूरी कायम गरिएको छ ।

चीनको हाङझोउमा एक प्राथमिक विद्यालयका हेडमास्टले विद्यार्थीहरुबीच दूरी कायम गराउन सबैलाई ‘एक मिटर ह्याट’ लगाउन अनिवार्य गरेका छन् ।

चीनको शिक्षा मन्त्रालयले बेइजिङमा विद्यार्थीको तापक्रम नापेपछि मात्र विद्यालयको गेटबाट प्रवेश गर्न पाइने व्यवस्था गरेको छ । त्यस्तै विद्यालय जान मोवाइल एपमा उनीहरुको स्वास्थ्य अवस्थाबारे ग्रिन कोड देखाउनुपर्नेछ ।

बेइजिङमा अहिले पनि विदेशबाट आउनेहरुलाई दुई हप्ता क्वारेन्टाइनमा राख्ने गरिएको छ ।