- २३ भाद्र २०८३, मंगलवार / Sep 8, 2026
सल्यान । दुई नाबालिका छोरीहरूको हत्या गरेको आरोपमा पक्राउ परेकी आमाले हत्या गरेको स्वीकार गरेकी छिन् । बुधबार बिहान बनगाड कुपिण्डे नगरपालिका –११ गलगौलमा दुई नाबालिका दिदीबहिनी घरभित्रै मृत भेटिएका थिए । २६ वर्षीया पुर्णिमा रानाले आफ्नै साढे २ वर्षीया छोरी करिष्मा राना र ६ महिनाकी छोरी रागवी रानाको घाँटी थिचेर हत्या गरेको सल्यान प्रहरी प्रमुख डिएसपी केशर न्यौपानेले बताए ।
बुधबार बिहान ११ बजेतिर श्रीमानसँग फोनमा झगडा भएको र त्यही रिसमा हत्या गरेको उनले बयान दिएकी छन् । पुर्णिमाको भनाई उद्धत गर्दै डिएसपी न्यौपानेले भने, “फोनमा कुरा गर्दागर्दै श्रीमानसँग झगडा भयो । त्यसपछि मैले रिस थाम्न सकिन, त्यही झोकमा उनीहरूको हत्या गरें । उनीहरूलाई पनि मार्ने र अनी आफू पनि मर्ने योजनामा पहिला बच्चालाई मारें । तर, आफू कसरी कसरी मर्न सकिँन ।” श्रीमानसँग झगडा हुँदा रिसको झोंकमा बच्चाहरूलाई मारेको उनले बयानमा भनेकी छन् ।
माघी पर्वमा घरमा आएपछि आफुलाई मार्ने र छोरीहरु आफ्नो नभएको भनेर पटक पटक श्रीमानले धम्की दिने गरेको पुर्णिमाले बताएकी छन् । आफ्नो आमा नभएर आफुले दुःख पाएको र त्यसै गरि छोरीहरूले पनि दुःख नपावस भनेर छोरीहरुको हत्या गरे र आफुले आत्महत्या गर्ने सोच बनाए भन्दै उनले प्रहरी समक्ष भनेकीछिन् । छोरी करिश्मा बुधबार बिहान छिमेकीको घरमा खेल्न गएको र १० बजे तिर घरमा फर्किएको समेत बताइन् ।
छोरीहरुको हत्या गरेपछि ठुली छोरी बिरामी परेको भन्दै गाउँको जेठानीलाई फोन गरेर खबर गरेको तर जेठानी जंगल गएको उनको भनाई छ । गाउँको हजुरआमा घरमा आँउदा दुबै छोरी मृत देखेको स्थानीयले बताए । घटना हुँदा मृतक दिदीबहिनीसँगै आमा पूर्णिमा पनि घरमै थिइन् । बुवा टेकमान राना भने रोजगारीका लागि नुवाकोटमा बस्छन् । दुबै नाबालिकाको शव पोस्टमार्टमका लागि जिल्ला अस्पताल सल्यान लगिएको छ । घटनाको थप अनुसन्धान भईरहेको प्रहरीले जनाएको छ ।
