निर्देशिका कार्यान्वयनको लागि अस्पतालहरुसँग छलफल

काठमाण्डौ । एक ठाउँमा भएको बिरामीको परीक्षणसम्बन्धी जानकारी आवश्यक पर्ने सबै स्वास्थ्य संस्थाले विद्युतीय रुपमा प्राप्त गर्ने गरी निर्देशिका स्वीकृत भएको छ ।

बिरामीले अस्पतालपिच्छे रिपोर्ट बोक्न नपर्ने निर्देशिका स्वीकृत भए पनि यो व्यवस्था कार्यान्वयनमा आउन केही दिन लाग्ने भएको हो ।
यसबाट बिरामीको खर्च, समय तथा परीक्षणमा हुने दोहोरोपनको अन्त्य हुनुका साथै स्वास्थ्य सम्बन्धी नीति निर्माणमा एकीकृत तथ्याङ्क प्राप्त हुने मन्त्रालयले जनाएको छ ।

अघिल्लो हप्ता स्वीकृत भएको निर्देशिका कार्यान्वयनको लागि अस्पतालहरुसँग छलफल भइरहेको स्वास्थ्य मन्त्रलायले जनाएको छ ।
स्वास्थ्य तथा जनसङ्ख्या मन्त्री प्रदीप पौडेलले अघिल्लो हप्ता एकीकृत ‘विद्युतीय चिकित्सा अभिलेख प्रणाली सञ्चालन तथा व्यवस्थापन निर्देशिका २०८१’ स्वीकृत गरेका हुन ।

निर्देशिका कार्यान्वयनमा आएपछि सरकारी तथा निजी सबै स्वास्थ्य संस्थाहरुले विद्युतीय चिकित्सा अभिलेख प्रणालीअन्तर्गत एक अर्कासँग बिरामीका तथ्याङ्क तथा विवरण साझा गर्न मिल्ने गरी विकसित प्रणालीमा अभिलेख राख्नुपर्ने र यसअनुसार अस्पतालमा भएको बिरामीको परीक्षणसम्बन्धी जानकारी विद्युतीय रूपमा सबै स्वास्थ्य संस्थामा पुग्ने मन्त्रालयले जनाएको छ ।