- ३१ भाद्र २०८३, बुधबार / Sep 16, 2026
काठमाडौँ, ९ कात्तिक । अमेरिकी राष्ट्रपति डोनाल्ड ट्रम्प मलेसियाको राजधानी क्वालालम्पुर पुगेका छन् । थाइल्याण्ड र कम्बोडियाबीच भएको शान्ति सम्झौता अवलोकनका साथै उनले दक्षिणपूर्वी एसियाली राष्ट्रहरूको संगठन आसियान (ASEAN) को शिखर सम्मेलनमा सहभागी हुने कार्यक्रम रहेको छ ।
गत जुलाईमा थाइल्याण्ड – कम्बोडिया सीमामा भएको सशस्त्र झडपमा दुई दर्जनभन्दा बढीको मृत्यु भएको थियो, जसलाई ट्रम्पको पहलपछि रोकिएको बताइन्छ । मलेसियामा रहँदा उनले क्षेत्रीय शान्ति र सहकार्यका विषयमा आफ्ना एजेन्डा प्रस्तुत गर्ने अपेक्षा गरिएको छ ।
ट्रम्पको यो भ्रमण एक हप्तासम्म चल्नेछ । यस अवधिमा उनले जापान र दक्षिण कोरिया समेत भ्रमण गर्दै एपेक (APEC) शिखर सम्मेलनमा भाग लिने कार्यक्रम रहेकाे छ । दक्षिण कोरियाको ग्योङ्जुमा हुने एपेक सम्मेलनका क्रममा ट्रम्पले चिनियाँ राष्ट्रपति सी जिनपिङसँग द्विपक्षीय भेटवार्ता गर्नेछन् ।
विश्लेषकहरूका अनुसार ट्रम्पको एशिया भ्रमणले अमेरिकी कूटनीति, व्यापार नीति र रणनीतिक प्रभावलाई दक्षिणपूर्वी एशियामा पुनः सुदृढ गर्ने उद्देश्य लिएको छ ।
