- ८ भाद्र २०८३, सोमबार / Aug 24, 2026
काठमाण्डौ । मौसम पूर्वानुमान महाशाखाले तराईका धेरै ठाउँमा आज र भोलि अत्यधिक गर्मी हुने सम्भावना रहेको जनाएको छ। मधेश, बागमती, गण्डकी, लुम्बिनी र सुदूरपश्चिम प्रदेशका तराई क्षेत्रमा तापक्रम ३८ डिग्री सेल्सियस वा सोभन्दा माथि पुग्ने अनुमान छ।
विशेषगरी लुम्बिनी प्रदेशको तराईमा तातो हावा र तातो लहरको जोखिम रहेको छ, जहाँ तापक्रम ४० डिग्री सेल्सियसभन्दा माथि मापन भएको छ।
महाशाखाले तातो हावाका कारण थकान, कमजोरी, टाउको दुख्ने, चक्कर आउने, बान्ता हुने र बेहोस हुने जस्ता स्वास्थ्य समस्या देखिन सक्ने चेतावनी दिएको छ। गर्मीबाट बच्न घरभित्र चिसो ठाउँमा बस्ने, हल्का र सुती कपडा लगाउने, टोपी प्रयोग गर्ने, प्रशस्त पानी र जुस पिउने तथा स्वास्थ्य समस्या देखिएमा तुरुन्त स्वास्थ्यकर्मीसँग सम्पर्क गर्न सुझाव दिइएको छ।
महाशाखाले विशेष बुलेटिन जारी गर्दै सबैलाई सतर्कता अपनाउन अनुरोध गरेको छ। गर्मीको समयमा बाहिरी गतिविधि कम गर्न र आवश्यक सावधानी अपनाउन स्थानीयवासीलाई आग्रह गरिएको छ।
