- ७ कार्तिक २०८३, शनिबार / Oct 24, 2026
काठमाडौँ, १६ असाेज । अर्थ मन्त्रालयले नेपाली नागरिक वा नेपाल आउने विदेशीलाई १५ सय अमेरिकी डलरभन्दा बढी विदेशी मुद्रा नगदमा नराख्न आग्रह गरेको छ। मन्त्रालयले बुधबार राति आफ्नो आधिकारिक सामाजिक सञ्जाल ‘एक्स’ (ट्विटर) मार्फत सूचना जारी गर्दै यस्तो आग्रह गरेको हो।
मन्त्रालयका अनुसार, विदेश भ्रमणबाट फर्किँदा बचत भएको वा वैध स्रोतबाट प्राप्त विदेशी मुद्रा अधिकतम १५ सय अमेरिकी डलर वा त्यस बराबरको परिवर्त्य विदेशी मुद्रा मात्र नगदमा राख्न पाइनेछ।सामाजिक सञ्जाल ‘एक्स’ मा मन्त्रालयले भनेको छ– “विदेश भ्रमणबाट फर्किँदा बचत भएको विदेशी मुद्रा वा वैध स्रोतबाट प्राप्त विदेशी मुद्रा अधिकतम अमेरिकी डलर १५०० वा सो बराबरको परिवर्त्य विदेशी मुद्रा नगदमा राख्न पाउने।
नेपाल आउने नेपाली वा विदेशी नागरिकले ५००० अमेरिकी डलर वा सो बराबरको रकम भन्सारमा घोषणा नगरी नेपाल भित्र्याउन पाउने र सोभन्दा बढी रकमको हकमा भन्सार विन्दुमा घोषणा गर्नुपर्ने।”
अबदेखि नेपाल आउने कुनै पनि नेपाली वा विदेशी नागरिकले ५ हजार अमेरिकी डलरभन्दा बढी नगद ल्याएमा भन्सारमा घोषणा गर्नुपर्नेछ। अन्यथा प्रचलित कानुनअनुसार कारबाही हुने मन्त्रालयले जनाएको छ।
मन्त्रालयका अनुसार, स्रोत खुलेको रकमलाई नगदमै सुरक्षित राख्न वा प्रयोग गर्न कुनै अवरोध छैन। तर स्रोत नखुलेको रकमका हकमा सम्पत्ति शुद्धीकरण निवारण ऐन, २०६४ बमोजिम अनुसन्धान हुनेछ।प्रचलित कानुनमा भएको व्यवस्थाबाहेक तोकिएको सीमा भन्दा बढी रकम कारोबार गर्नुपर्ने अवस्था आएमा अनिवार्य रूपमा बैंकिङ प्रणालीमार्फत मात्र गर्नुपर्नेछ।
रामेश्वर खनाल अर्थमन्त्री बनेपछि मन्त्रालयले वित्तीय अनुशासन र अनुत्पादक खर्च कटौतीमा कडाइ गर्दै आएको छ। यसैअनुरूप विदेशी मुद्रा सम्बन्धी व्यवस्थामा समेत थप कडाइ गरिएको हो।
