तिहारमा बिके ५० करोडका फूल

काठमाडौं । यो वर्षको तिहारमा ५० करोड रुपैयाँ बराबर फूलको बिक्रि भएको छ । सबैभन्दा बढी खपत काठमाडौं उपत्यकामा भएको हो । गत वर्षकै हाराहारीमा फूलको कारोबार भएको फ्लोरिकल्चर एसोसिएसनका अध्यक्ष दिलीप बादेले बताए । बजार माग हरेक वर्ष १५ देखि २० प्रतिशतसम्म वृद्धि हुने तर उत्पादन भने बढीमा १० प्रतिशतले मात्र वृद्धि हुने गरेको छ ।

विशेषगरी तिहारमा प्रयोग हुने मखमली र गोदावरी फूल स्वदेशी उत्पादनले नै पुग्ने गरेको भए पनि सयपत्री र रातो गुलाफ भने भारतबाट आयात गर्नुपर्ने बाध्यता रहेको अध्यक्ष बादेले बताए । काठमाडौँ उपत्यकाका तीन जिल्लासहित कास्की, चितवन, मकवानपुर, काभ्रेपलाञ्चोक, गुल्मी, पाल्पा, धादिङ, मोरङलगायत ५२ वटा जिल्लामा पुष्पखेती विस्तार भएका छन् ।

नेपालमा हाल २२१ हेक्टरमा एक हजार १८४ व्यवसायीले पुष्पखेती गरेका छन् । व्यावसायिक रूपमा ४५० प्रजातिका फूल उत्पादन हुँदै आएको छ । यसबाट ४४ हजारभन्दा बढी लाभान्वित भएको बादेको भनाइ छ ।