देशभर गर्मीको प्रकोप : तातो हावाबाट जोगिन आग्रह

काठमाण्डौ । देशभर गर्मी बढ्दो क्रममा छ । तराई–मधेशका भैरहवा, नेपालगञ्ज र धनगढीमा गर्मीले जनजीवन कष्टकर बनेको छ ।

भैरहवामा ४१.३, धनगढीमा ४०.८ र नेपालगञ्जमा ४० डिग्री सेल्सियस तापक्रम पुगेको छ । आगामी तीन दिन वर्षाको सम्भावना नभएकाले तापक्रम थप बढ्ने मौसमविद्को अनुमान छ । लुम्बिनी र सुदूरपश्चिममा सुक्खा मौसमका कारण गर्मी झनै चर्किएको छ । तातो हावाको लहर (लू) चल्न सक्ने जोखिम रहेकाले सावधानी अपनाउन जल तथा मौसम पूर्वानुमान महाशाखाले सुझाएको छ ।

आज देशका अधिकांश स्थानमा मौसम सफा छ । कोशी, बागमती, गण्डकी र कर्णालीका पहाडी भेगमा आंशिक बदली र कोशी–गण्डकीका एक–दुई ठाउँमा मेघगर्जनसहित हल्का वर्षाको सम्भावना छ । राति पनि कोशी र गण्डकीका पहाडी क्षेत्रमा आंशिक बदली रहने बताइएको छ ।