गर्मीले ६ जनाको मृत्यु, सावधानी अपनाउन आग्रह

काठमाडौं । भारतको राजस्थानमा भीषण गर्मीका कारण ६ जनाको मृत्यु भएको छ । तापक्रम ४९ डिग्री सेल्सियस पुगेको र ६ जनाको मृत्यु भएको संचारमाध्यमले जनाएका छन् ।

राजस्थानका सबै ठाउँमा ४५ डिग्री सेल्सियसभन्दा बढी तापक्रम छ । स्थानीय सरकारले गर्मी मौसममा सावधानी अपनाउन आग्रह गरेको छ ।

राजस्थानमा ‘हिट स्ट्रोक’ बिरामीहरूको सङ्ख्या सोमबार दुई हजार आठ सय नौबाट बढेर तीन हजार छ सय २२ पुगेको छ । मौसम विभागले पहिले नै मानिसहरूलाई गर्मीको जोखिमबाट बच्न र चिसो ठाउँमा बस्न सुझाव दिएको छ । विभागले तिर्खा नलागे पनि पर्याप्त पानी पिएर ‘हाइड्रेटेड’ रहन आग्रह गरेको हो ।

भारत गर्मीको चपेटामा छ । यसबाट मानिसहरूको स्वास्थ्य र जीविकोपार्जनमा गम्भीर असर पारेको छ । गत महिना भारतीय मौसम विभागले देशले अप्रिलदेखि जुनसम्म चरम गर्मीको सामना गर्ने र मध्य तथा पश्चिमी प्रायद्वीप क्षेत्रहरू सबैभन्दा बढी प्रभावित हुने अनुमान गरेको थियो ।