- २३ श्रावण २०८३, शनिबार / Aug 8, 2026
काठमाडौँ, २५ पुष । गैरआवासीय नेपाली संघ राष्ट्रिय समन्वय परिषद् अमेरिका (एनआरएनए एनसीसी यूएसए) ले नेपाल सरकारका युवा तथा खेलकुदमन्त्री बब्लु गुप्तालाई अमेरिकामा कुनै पनि कार्यक्रममा आमन्त्रण नगरेको स्पष्ट पारेको छ ।
एनआरएनए एनसीसी यूएसएले प्रेस विज्ञप्ति जारी गर्दै आफ्नो संस्थाको आयोजनामा अमेरिकामा कुनै पनि युवासम्बन्धी कार्यक्रम आयोजना नगरिएको जानकारी दिएको छ ।
विज्ञप्तिमा भनिएको छ, ‘संघले नेपाल सरकारका युवा तथा खेलकुदमन्त्री माननीय बब्लु गुप्तालाई अमेरिकामा कुनै पनि कार्यक्रममा आमन्त्रण नगरेको स्पष्ट गर्दै एनआरएनए एनसीसी यूएसएको तर्फबाट अमेरिकामा कुनै पनि युवासम्बन्धी कार्यक्रम आयोजना नभएको जानकारी गराइन्छ।’
संस्थाले आफ्नो नाम, ईआईएन नम्बर तथा आधिकारिक वेबसाइटको दुरुपयोग गर्दै अनधिकृत कार्यक्रमहरू सञ्चालन भइरहेको तथा मानव तस्करीजस्ता गम्भीर गैरकानुनी गतिविधिको आशंका हुने खालको विश्वसनीय जानकारी प्राप्त भएको समेत जनाएको छ ।
एनआरएनए एनसीसी यूएसएले कुनै पनि अनधिकृत गतिविधि, कार्यक्रम वा कथित युवा कार्यक्रमसँग आफ्नो संस्थाको कुनै प्रकारको संलग्नता, स्वीकृति वा सम्बन्ध नरहेको स्पष्ट पारेको छ ।
संस्थाको आधिकारिक स्वीकृतिबिनाका कार्यक्रम, भ्रमण, फन्डरेजिङ वा अन्य गतिविधिहरू पूर्ण रूपमा अवैध र अमान्य ठहरिने पनि विज्ञप्तिमा उल्लेख गरिएको छ ।
