- २० जेष्ठ २०८३, बुधबार / Jun 3, 2026
मलङ्गवा, २० माघ । सर्लाही जिल्ला प्रशासन कार्यालयले इतिहासमै पहिलोपटक आमाको नामबाट नागरिकता जारी गरेको छ । सोमबार लालबन्दी नगरपालिका–७ का राम मनोहर गुप्तालाई आमाको नामबाट अङ्गीकृत नेपाली नागरिकता प्रदान गरिएको हो ।
प्रमुख जिल्ला अधिकारी रामुराज कँडरियाका अनुसार नेपाल नागरिकता ऐन, २०६३ को दोस्रो संशोधन तथा नियमावलीको चौथो संशोधनको आधारमा नागरिकता जारी गरिएको हो । बाबु विदेशी र आमा नेपाली भएका गुप्ताले आवश्यक कानुनी प्रक्रिया पूरा गरेपछि नागरिकता प्राप्त गरेका हुन् ।
योसँगै अब सर्लाही जिल्लामा बाबुको पहिचान नभएका वा विदेशी बाबु र नेपाली आमाबाट जन्मिएका सन्तानले पनि नागरिकता पाउने बाटो खुलेको छ । ऐन संशोधनपछि जिल्लाका २० वटै पालिकामा यससम्बन्धी परिपत्र गरिसकिएको प्रशासनले जनाएको छ ।
नागरिकताविहीन समस्या समाधान हुने अपेक्षा
प्रमुख जिल्ला अधिकारी कँडरियाले नागरिकता नहुँदा शिक्षा र सीप भएर पनि रोजगारी, बैंक खाता खोल्न तथा सिमकार्ड लिन नसक्ने समस्यामा रहेका युवाहरूलाई अब राहत पुग्ने विश्वास व्यक्त गरे । प्रशासनको यो कदमले जिल्लामा रहेका धेरै नागरिकताविहीन नेपाली सन्तानको समस्या समाधान हुने अपेक्षा गरिएको छ ।
लामो समयको सङ्घर्षपछि नागरिकता पाएका राम मनोहर गुप्ताले आफू आधिकारिक रूपमा नेपाली नागरिक बनेकोमा खुसी व्यक्त गरे । नेपालको भूमिमा जन्मिएर पनि नेपाली भएको प्रमाणित गर्न निकै कठिन सङ्घर्ष गर्नुपरेको उनले बताए ।
