- २२ भाद्र २०८३, सोमबार / Sep 7, 2026
काठमाडौं, ३० चैत । माध्यमिक शिक्षा परीक्षा (एसईई) खारेज गर्ने विषयमा संसदको शिक्षा, स्वास्थ्य तथा प्रविधि समितिको उपसमितिमा सहमति भएको छ । विद्यालय शिक्षा विधेयकमाथिको दफावार छलफलका क्रममा यस्तो निर्णय भएको हो ।
उपसमितिका अनुसार कक्षा १ देखि ८ सम्मको आधारभूत तहको परीक्षा स्थानीय तहले सञ्चालन गर्नेछ भने माध्यमिक तहको परीक्षा राष्ट्रिय परीक्षा बोर्डले लिनेछ । “विद्यालय तहको अन्तिम परीक्षा कक्षा १२ मा मात्र हुने भएकाले कक्षा १० को परीक्षा स्कूल स्तरमै सञ्चालन गर्ने सहमति भएको छ,” शिक्षा समितिका एक स्रोतले बताए ।
विधेयकमाथि केही सांसदले एसईईको जिम्मेवारी प्रदेशलाई दिनुपर्ने संशोधन प्रस्ताव राखेका थिए । तर, उपसमितिको छलफलमा एसईई पूर्ण रूपमा हटाउने निर्णय भएको हो । यसैगरी, जिल्ला शिक्षा कार्यालय र शिक्षा विभाग खारेज गर्ने र प्रारम्भिक बालविकास शिक्षा (ईसीडी) लाई दुई वर्षको बनाउने सहमति पनि भएको छ ।
उपसमितिमा भएका यी सहमतिहरू हाल सार्वजनिक गरिएको छैन । सबै विषयमा टुंगो लगाएर पूर्ण समितिमा पेस गर्ने तयारी भइरहेको छ । उपसमितिमा विधेयकमाथि निरन्तर छलफल जारी छ । प्रदेशबाट प्राप्त सुझाव, सांसदका संशोधन र विज्ञहरूको रायलाई समेट्दै दफावार छलफल भइरहेको छ ।शिक्षकहरूले विधेयक तत्काल जारी गर्न माग गरिरहेकाले छलफललाई तीव्रता दिइएको छ ।
“शिक्षक र सरकारबीच वार्ता भइरहेको छ । गत वर्षका सहमति र नयाँ मागहरूलाई समेट्न बाँकी छ,” उपसमितिका एक सदस्यले भने । सरकार र नेपाल शिक्षक महासंघबीच २० चैतदेखि वार्ता जारी भए पनि सहमति हुन सकेको छैन । शिक्षकहरूले सडक आन्दोलनलाई निरन्तरता दिइरहेका छन् ।
