प्रहरी कर्मचारीको राजीनामा स्वीकृत नगर्न प्रहरी प्रधान कार्यालयको निर्देशन

काठमाडौं, ३० चैत । प्रहरी प्रधान कार्यालयले मातहतका सबै कार्यालयलाई प्रहरी कर्मचारीको राजीनामा स्वीकृत नगर्न निर्देशन जारी गरेको छ ।

यो निर्देशन हाल देशभर चलिरहेका आन्दोलन र प्रदर्शनलाई मध्यनजर गर्दै दिइएको हो । अख्तियार दुरुपयोग अनुसन्धान आयोग, प्रहरी महानिरीक्षकको सचिवालय, सबै विभाग, ब्युरो, काठमाडौं उपत्यका प्रहरी कार्यालय रानीपोखरी र सबै प्रदेश प्रहरी कार्यालयलाई यो निर्देशन पालना गर्न भनिएको छ ।

प्रहरी प्रधान कार्यालयका अनुसार अर्को आदेश नआएसम्म कुनै पनि कर्मचारीको राजीनामा स्वीकृत गरिने छैन ।

पछिल्लो समय काठमाडौं केन्द्रित विभिन्न आन्दोलन र प्रदर्शन भइरहेका छन् । शिक्षक, आवासीय चिकित्सक, विभिन्न संघ–संगठन र समूहका आन्दोलन अझै जारी छन् । खासगरी राजावादीहरूको प्रदर्शन हिंसात्मक बनेपछि आन्दोलन र प्रदर्शनमा प्रहरीको ठूलो संख्यामा परिचालन भइरहेको छ ।