- ६ असार २०८३, शनिबार / Jun 20, 2026
काठमाडाैं, ६ जेठ । देशभर नेवार समुदायले सिथि नखः पर्व विशेष उत्साहका साथ मनाएका छन्। पर्वको अवसरमा टोल–टोलमा रहेका इनार, ढुंगेधारा, कुवा र पोखरी सफा गर्ने परम्परा पालना गरिएको छ।
यो पर्व नेवार समुदायको मौलिक सांस्कृतिक चाडमध्ये एक मानिन्छ, जसमा अन्य चाडजस्तै भोज र पूजा मात्र नभई पानीका परम्परागत स्रोतहरूको सरसफाइलाई मुख्य गतिविधि बनाइन्छ।
टोलवासीहरू मिलेर सामूहिक रूपमा पानीका मुहान सफा गर्ने परम्परा लामो समयदेखि चलिआएको छ। वर्षा याम सुरु हुनुअघि पर्ने यस पर्वमा पानीका स्रोतहरूको संरक्षण र सफाइलाई विशेष महत्व दिइन्छ।
जनविश्वास अनुसार सिथि नखःका दिन इनार, कुवा र ढुंगेधारा सफा गरेपछि वर्षभरि पानीको अभाव नहुने विश्वास रहँदै आएको छ। सफा गरिएका पानीका स्रोतलाई केही दिन प्रयोग नगरी चार दिनपछि पूजा गरेर मात्र प्रयोग गर्ने परम्परा पनि छ।
पर्वका अवसरमा मास, मुगी, केराउलगायतका दाल तथा बारा, चटामरी, पापड, मालपुवा र म्हुछ्यामारी जस्ता परम्परागत परिकारहरू बनाएर खाने चलन छ।
