- ३ आश्विन २०८३, शनिबार / Sep 19, 2026
एजेन्सी । रेमाल नामको आँधीका कारण १६ जनाको मृत्यु भएको छ । भारत र दक्षिणी बङ्गलादेशको तटीय क्षेत्रमा आएको उक्त आँघीका कारण १६ जनाको मृत्यु भएको हो । बंगलादेशको मोङ्ला बन्दरगाह र भारतको पश्चिम बङ्गालको सागर टापु हुँदै आइतबार आएको आँधीले अर्को दिन कमजोर बनाएको थियो।
उक्त क्षेत्रमा ११० किलोमिटर प्रतिघण्टाको रफ्तारमा आएको हावाहुरी, मुसलधारे वर्षा र ज्वारभाटाका कारण तल्लो क्षेत्र जलमग्न भएको थियो। आइतबार साँझ आएको रेमाल आँधीका कारण करिब १० लाख मानिसलाई सुरक्षित स्थानमा सारिएको छ। स्थानीय अधिकारीहरुका अनुसार ३६ लाख बालबालिकासहित करिब ८४ लाख मानिस चक्रवातबाट प्रभावित भएका छन्।
आँधीले बंगलादेशको कुआकाटा समुद्र तटमा रहेको एक बजार तहसनहस पारेको छ। छिमेकी मुलुक भारतमा पश्चिम बङ्गाल राज्य सरकारका वरिष्ठ अधिकारी सुमित गुप्ताले करेन्ट लागेर तीनसहित कम्तीमा छ जना सर्वसाधारणको मृत्यु भएको पुष्टि गरेका छन्।
बङ्गलादेशका विपद्मन्त्री मोहिबबुर रहमानले चक्रवातका कारण कम्तीमा १० जनाको मृत्यु भएको जनाएका छन्। कोही डुबेर मरेका छन् भने कोही भत्किएका घरमुनि पुरिएर ज्यान गुमाएका छन्।
कुल ३७ लाख ५० हजार मानिस प्रभावित भएका छन्। ३५ हजार ४ सय ८३ घर ध्वस्त भएका छन् भने १ लाख १५ हजार ९ सय ९२ घरमा क्षति पुगेको छ।
