पूर्वपश्चिम राजमार्ग अवरुद्ध

नवलपरासी । नारायणगढ–बुटवल सडकखण्डअन्तर्गत नवलपरासी बर्दघाट–सुस्तापूर्वमा सडक भासिँदा राजमार्ग अवरुद्ध भएको छ । वर्षाका कारणका गएराति २ बजेको समयमा गैँडाकोट ९ थुम्सीको जंगलमा सडक भासिँदा राजमार्ग अवरुद्ध भएको हो ।

प्रहरी कार्यालय नवलपरासीका सूचना अधिकारी एवं प्रहरी नायब उपरीक्षक बेदबहादुर पौडेलले निर्माणाधीन सडक भासिँदा राजमार्ग दुईतर्फी नै अवरुद्ध भएको बताए । अवरुद्ध सडकमा ट्रक फसेकाले हटाउने काम भइरहेको छ ।

भासिएको सडकमा पश्चिमबाट पूर्वतर्फ जाँदै गरेको लु १ ख ८५१३ नम्बरको यात्रुबाहक बसमा एक्कासी ब्रेक लगाउँदा त्यसमा सवार आठ यात्रु सामान्य घाइते भएका छन् । बस हुत्तिएर अर्को बसमा ठोक्किँदा यात्रु घाइते भएको प्रहरी नायब उपरीक्षक पौडेलले बताए । सडक एकतर्फी भए पनि खुलाउने प्रयास भइरहेको छ ।