- २२ असार २०८३, सोमबार / Jul 6, 2026
काठमाडौं, १० मंसिर । अध्ययन भिसाको दुरुपयोग बढ्दै गएपछि अध्यागमन विभागले नेपालमा अध्ययन भिसामा आएका विदेशी नागरिकमाथि विशेष निगरानी कडा पारेको छ ।
विभागका अनुसार धेरै विदेशी विद्यार्थीले भिसाको उद्देश्य विपरीत गैरकानुनी गतिविधि गर्ने, नियमित कक्षा नपढ्ने तथा भिसा विस्तारका लागि नक्कली कागजात पेश गर्ने गरेको पाइएको छ । शैक्षिक संस्थाले पनि अध्ययन भिसाको योग्यता नपुगेका तथा कानुन बर्जित गतिविधिमा संलग्न व्यक्तिहरूलाई समेत भिसाका लागि सिफारिस गरेको खुलासा भएपछि अध्यागमनले कडाइ अपनाएको हो ।
विभागका निर्देशक तथा सूचना अधिकारी टिकाराम ढकालका अनुसार केही विदेशीले कोर्ष पूरा गरेपछि शैक्षिक प्रमाणपत्र पेश गर्न नसकेको, कक्षामा उपस्थित नभएको र भिसा अवधि थप गर्न नक्कली कागजात प्रयोग गरेको तथ्य बाहिर आएको छ । यसपछि अध्यागमनले एक सूचना जारी गर्दै शैक्षिक संस्थाहरूलाई योग्य विद्यार्थीबाहेक कसैलाई पनि भिसा सिफारिस नगर्न कडाइका साथ निर्देश दिएको छ ।
