- २२ श्रावण २०८३, शुक्रबार / Aug 7, 2026
काठमाण्डौ, २३ पुस । तराई तथा मधेशका धेरैजसो क्षेत्रमा आज पनि बाक्लो हुस्सु र कुहिरो लागेको छ। जल तथा मौसम पूर्वानुमान महाशाखाका अनुसार तराईका प्रायः सबै ठाउँमा हुस्सु र कुहिरो कायमै रहेको छ र दिउँसोसम्म पनि पूर्ण रूपमा नहट्ने सम्भावना छ।
हुस्सु र कुहिरोको प्रभावका कारण दैनिक जनजीवन, पर्यटन, स्वास्थ्य तथा हवाई र सडक यातायातमा आंशिक असर पर्ने महाशाखाले जनाएको छ। यसका कारण आवश्यक सतर्कता अपनाउन महाशाखाले सर्वसाधारणलाई आग्रह गरेको छ। तराई क्षेत्रमा लगातारको बाक्लो हुस्सु र कुहिरोले जनजीवन प्रभावित हुँदै आएको छ।
चिसो मौसमका कारण विशेष गरी विपन्न वर्ग र मजदुरहरू बढी मर्कामा परेका छन्। चिसो बढेसँगै बालबालिका तथा वृद्धवृद्धामा रुघाखोकी, ज्वरोलगायत स्वास्थ्य समस्या बढ्दै गएको छ।
मौसम पूर्वानुमान महाशाखाका अनुसार हाल देशभर पश्चिमी वायुको आंशिक प्रभाव रहेको छ। यसका कारण उच्च पहाडी तथा हिमाली क्षेत्रमा आज आंशिक बदली रहनेछ भने बाँकी भूभागको मौसम सामान्यतया सफा रहने अनुमान गरिएको छ।
आज बिहान पौने ६ बजेको मापनअनुसार काठमाण्डौ उपत्यकाको न्यूनतम तापक्रम ३.५ डिग्री सेल्सियस रहेको छ। हिजो काठमाण्डौको न्यूनतम तापक्रम ३ डिग्री सेल्सियस मापन गरिएको थियो।
