थानकोटमा घरायसी विवादले उग्र रूप लिँदा युवकको चक्कु प्रहार गरी हत्या, भिनाजु पक्राउ

काठमाडौँ, ३ जेठ । काठमाडौँको चन्द्रागिरी नगरपालिका–३ थानकोट खरिबोटमा घरायसी विवादका क्रममा चक्कु प्रहार गरी एक युवकको हत्या भएको छ। शनिबार राति भएको घटनामा महोत्तरी घर भई हाल थानकोट बस्ने ३८ वर्षीय समि अहमदले आफ्नै सालो पर्ने जाकिर मन्सुरीको हत्या गरेको प्रहरीले जनाएको छ।

प्रहरीका अनुसार राति करिब ९:१५ बजे उनीहरूबीच घरायसी विषयमा विवाद भएको थियो। विवाद बढ्दै गएपछि अहमदले तरकारी काट्ने चक्कुले २०–२५ वर्षका जाकिर मन्सुरीमाथि प्रहार गरेका थिए। चक्कु प्रहारबाट गम्भीर घाइते भएका जाकिरलाई तत्काल उपचारका लागि सतुङ्गलस्थित मेड पोइन्ट अस्पताल लगिएको थियो। तर उपचारकै क्रममा राति ९:३० बजे चिकित्सकले उनलाई मृत घोषणा गरेका थिए।

मृतक जाकिरको स्थायी घर महोत्तरीको गौशाला नगरपालिका–५ रहेको प्रहरीले जनाएको छ। घटनापछि प्रहरी वृत्त थानकोटबाट खटिएको टोलीले आरोपी समि अहमदलाई नियन्त्रणमा लिएको छ। घटनामा प्रयोग भएको चक्कु समेत बरामद गरिएको छ। प्रहरीले मृतकको शव पोष्टमार्टमका लागि महाराजगञ्जस्थित टिचिङ अस्पताल पठाएको जनाएको छ।