- ३ जेष्ठ २०८३, आईतवार / May 17, 2026
सिराहा, ३ जेठ । सशस्त्र प्रहरीले सिराहा जिल्लाको नवराजपुर गाउँपालिका–५ देवनगरस्थित सीमा क्षेत्रमा अवैध सामानसहित दुई जनालाई पक्राउ गरेको छ।
शनिबार राति करिब १९ लाख ४७ हजार ३ सय रुपैयाँ बराबरका सामान तथा ट्रकसहित दुई जनालाई नियन्त्रणमा लिइएको सशस्त्र प्रहरीले जनाएको छ। नं. ७ गण सिराहाबाट खटिएको गस्ती टोलीले सोही ठाउँका ५० वर्षीय राजेश यादव र ३९ वर्षीय आनन्द यादवलाई नियन्त्रणमा लिएको हो। उनीहरू ट्रकका चालक र सहचालक रहेको बताइएको छ।
भारततर्फ अवैध रूपमा लैजाँदै गरेको अवस्थामा स १ ख ५३५ नम्बरको ट्रकसहित विभिन्न सामान बरामद गरिएको हो। बरामद सामग्रीमा कस्मेटिक सामान, टुथपेस्ट तथा करिब २६० केजी ओखर रहेको छ। ट्रकको अन्दाजी मूल्य करिब २१ लाख रुपैयाँ रहेको प्रहरीले जनाएको छ।
बरामद सामान र पक्राउ परेकालाई आवश्यक कारबाहीका लागि नेपाल प्रहरीलाई बुझाइएको छ भने सामान भन्सार कार्यालयमा बुझाउने प्रक्रिया अगाडि बढाइएको छ।
