- ३० असार २०८३, मंगलवार / Jul 14, 2026
काठमाडौँ, माघ १६ । उपल्लो मुस्ताङको लोमान्थाङ गाउँपालिका–१ स्थित छोसेर गाउँ नजिकैको भन्सार कार्यालय आसपास क्षेत्र हिउँले छपक्कै ढाकिएको छ। हालै परेको हिमपातपछि छोसेर गाउँ, भन्सार कार्यालय तथा वरपरका क्षेत्र सेताम्मे देखिएका छन्।
लगातारको हिमपातका कारण उपल्लो मुस्ताङ क्षेत्रको प्राकृतिक दृश्य अझ आकर्षक देखिए पनि स्थानीय बासिन्दाको दैनिक जीवन भने प्रभावित भएको छ। बस्ती वरपर बाक्लो हिउँ जम्दा आवतजावतमा कठिनाइ बढेको छ।
स्थानीयवासीका अनुसार रातिदेखि परेको हिउँले घरका छत, बाटोघाटो र खुला स्थान पूर्ण रूपमा ढाकिएका छन्। चिसो बढेसँगै पानीका धाराहरू जम्ने, पशुपालन तथा दैनिक कामकाजमा समस्या देखिन थालेको छ।
प्रशासन तथा सुरक्षाकर्मीले हिमपातको अवस्थालाई ध्यानमा राख्दै सतर्कता अपनाउन स्थानीयलाई आग्रह गरेका छन्। आवश्यक परे सहयोगका लागि सुरक्षाकर्मी परिचालन गरिने जनाइएको छ।
