- ८ बैशाख २०८३, मंगलवार / Apr 21, 2026
काठमाडौँ, १९ माघ । फेरि पश्चिमी न्यून चापीय प्रणाली केही बलियो बन्दै मौसम बदली गराउने अवस्थामा पुगेको छ । एक हप्ता अघि वर्षा र हिमपातपछि खुलेको मौसम पुनः बिग्रिन लागेको हो ।
गत मंगलबार र बुधबार वर्षा तथा हिमपातका कारण कोशी र मधेशबाहेकका क्षेत्रको जनजीवन प्रभावित भएको थियो । त्यसयता खुलेको मौसम एक सातामै फेरि सक्रिय वर्षा गराउने प्रणालीका कारण बदलिन लागेको जल तथा मौसम विज्ञान विभागले जनाएको छ ।
आजदेखि सुदूरपश्चिम क्षेत्रमा उक्त प्रणालीको हल्का असर देखिन थालेको छ । जल तथा मौसम विज्ञान विभाग, मौसम पूर्वानुमान महाशाखाका मौसमविद् सञ्जीव अधिकारीका अनुसार सोमबारदेखि यो प्रणाली पश्चिम क्षेत्रका उच्च हिमाली तथा पहाडी भूभागमा फैलिँदै जानेछ भने मङ्गलबार मध्य नेपालसम्म विस्तार हुनेछ ।
प्रभावित क्षेत्रमा पूर्ण बदली हुने र बाँकी क्षेत्रमा आंशिक बदली भई चिसो बढ्ने अनुमान गरिएको छ । पश्चिम नेपालमा अहिले नै चिसो र हिमपात भइरहेको अवस्थामा पुनः सक्रिय प्रणालीले मध्यमसम्मको वर्षा तथा हिमपात गराउने मौसमविद् अधिकारीले जानकारी दिनुभयो ।
उच्च पहाडी तथा हिमाली क्षेत्रमा हिमपात र अन्य भूभागमा हल्कादेखि मध्यमसम्म वर्षा हुने सम्भावना रहेको छ । काठमाडौँ उपत्यकामा मङ्गलबार राति छिटपुट वर्षा हुन सक्ने पूर्वानुमान गरिएको छ ।
सोमबार तराईका केही स्थानमा हुस्सु–कुहिरो लाग्नेछ भने हिमाली भूभागमा साधारणतया बादल लाग्नेछ । बाँकी पहाडी तथा तराई भूभागमा आंशिक बदली रहने महाशाखाले जनाएको छ ।
देशका हिमाली भूभागका एक–दुई स्थानमा हल्का हिमपात वा वर्षाको सम्भावना रहेको छ । सोमबार राति तराईका थोरै स्थानमा हुस्सु लाग्ने तथा गण्डकी, लुम्बिनी, कर्णाली र सुदूरपश्चिम प्रदेशका हिमाली क्षेत्रमा बदली रहने पूर्वानुमान छ ।
