पूर्व मालपाेत अधिकृत जेल चलान

काठमाडौं । ललितानिवासको सरकारी जग्गा हिनामिना मुद्दामा तत्कालीन मालपोत अधिकृतलाइ जेल चलान गरिएकाे छ । विशेष अदालतका न्यायाधीश शिवराज अधिकारी र चन्द्रबहादुर सारूको इजलासले थुनामा राख्ने आदेश दिएपछि अधिकृत कृष्णप्रसाद पौडेल जेल चलान भएका हुन् ।

अख्तियार दुरुपयोग अनुसन्धान आयोगले माघ २२ गते १ सय ७५ जना विरुद्ध अदालतमा मुद्दा दायर गरेको थियो । आफैँ अदालतमा उपस्थित भएका पौडेललाई पुर्पक्षमा राख्नुपर्ने आदेश दिएको हो । यस जग्गा प्रकरणमा पौडेल नै अदालतमा उपस्थित हुने पहिलो प्रतिवादी हुन् ।

प्रधानमन्त्रीनिवास विस्तारको नाममा गलत लिखत तयार पारी नक्कली मोही खडा गरेर करिब १४ रोपनी जग्गा मासिएको अभियोग पौडेलमाथि लागेको छ । पौडेलविरुद्ध ३२ करोड १९ लाख २० हजार रुपैयाँ बिगो दाबी सहितको मुद्दा दायर गरिएको छ ।