बाजुरामा बस दुर्घटना हुँदा २४ जना घाइते

धनगढी, ०७ असार । बाजुरामा बस दुर्घटना हुँदा २४ जना घाइते भएका छन् । बुढीगंगा नगरपालिका–१० को रिठा बजार नजिक आज बिहान पवनदूत यातायातको सुपप्र ०२ ००१ ख १३५५ नम्बरको बस दुर्घटनामा परेको हो ।

प्रहरीका अनुसार बाजुरामा बस दुर्घटना हुँदा बसमा सवार २४ जना घाइते भएका छन् । प्रदेश ट्राफिक प्रहरी कार्यालय अत्तरियाका प्रमुख प्रहरी उपरीक्षक (एसपी) नवराज कार्कीले दुर्घटनामा २४ जना घाइते भएको जानकारी दिए ।

घाइतेमध्ये २३ जनालाई उपचारका लागि जिल्ला अस्पताल बाजुरा लगिएको छ भने एक जनालाई अछामस्थित बयलपाटा अस्पताल पठाइएको प्रहरीले जनाएको छ । दुर्घटनाग्रस्त बसमा ३५ जना सवार रहेको एसपी कार्कीले बताए ।

प्रहरीका अनुसार बसको ब्रेक फेल भएपछि बाजुरामा बस दुर्घटना भएको हो । घटनाबारे थप अनुसन्धान भइरहेको प्रहरीले जनाएको छ ।