- ३ जेष्ठ २०८३, आईतवार / May 17, 2026
१५ जेठ २०७७ काठमाडौं । संविधान संशोधन गरेर नेपालको नयाँ नक्सा, निशान छाप लगायतका विषयमा साझा धारणा बनाउन प्रमुख प्रतिपक्ष नेपाली कांग्रेसले केन्द्रीय कार्य समितिको बैठक बोलाएको छ ।
जेठ १७ गते दिउँसो १ बजेका लागि पार्टी केन्द्रीय कार्यालय बीपी स्मृति भवनमा बैठक बोलाइएको हो । बैठकमा सरकारले संसदमा दर्ता गराएको संविधान संशोधन प्रस्तावमा छलफल हुने काँग्रेसले जनाएको छ ।
मंगलबार प्रधानमन्त्री केपी शर्मा ओलीले बोलाएको सर्वदलीय बैठकमा कांग्रेस सभापति शेरबहादुर देउवाले नयाँ नक्सालाई आधिकारिकता दिन संसदमा दर्ता भएको संविधान संशोधन प्रस्तावबारे केन्द्रीय कार्यसमिति बैठकबाट आधिकारिक धारणा बनाउने बताएका थिए ।
त्यसपछि बुधबार संसदमा अघि बढाउने भनिएको संविधान संशोधन प्रस्ताव रोकिएको थियो । भारतले हडपेको लिपुलेक, लिम्पियाधुरा र कालापानी क्षेत्रलाई समेटेर जारी गरिएको नयाँ नक्सालाई संसदबाट सर्वसम्मत पारित गराउनका लागि दलहरु यतिबेला छलफलमा जुटेका छन् ।
