- ७ असार २०८३, आईतवार / Jun 21, 2026
काठमाडौं, ०७ असार । फिफा विश्वकप–२०२६ अन्तर्गत समूह ‘ई’को खेलमा आइभोरी कोस्टलाई २–१ गोल अन्तरले पराजित गर्दै जर्मनी नकआउट चरणमा प्रवेश गरेको छ ।
आइतबार बिहान सम्पन्न खेलमा एक गोलले पछाडि परेको अवस्थाबाट पुनरागमन गर्दै जर्मनीले महत्वपूर्ण जित निकालेको हो । जर्मनीका डेनिज उन्डवले इन्जुरी समयमा गरेको गोल निर्णायक बनेको थियो ।आइभोरी कोस्टका लागि फ्रान्क केसिईले खेलको ३० औँ मिनेटमा गोल गर्दै टोलीलाई सुरुआती अग्रता दिलाएका थिए ।
जर्मनीका डेनिज उन्डवले ६८ औँ मिनेटमा गोल गर्दै खेललाई १–१ को बराबरीमा ल्याए । उनी यामल मुसियलाको स्थानमा ६० औँ मिनेटमा मैदान प्रवेश गरेका थिए । बराबरीतर्फ उन्मुख खेलमा उन्डवले इन्जुरी समयको चौथो मिनेटमा व्यक्तिगत दोस्रो गोल गर्दै जर्मनीलाई २–१ को जित दिलाए । यही जितसँगै जर्मनी नकआउट चरणमा पुग्न सफल भएको हो ।
आइभोरी कोस्टले पहिलो खेलमा इक्वेडरलाई १–० ले पराजित गरेको थियो । जर्मनीले भने आफ्नो पहिलो खेलमा कुरासाओमाथि ७–१ को फराकिलो जित निकालेको थियो ।
यस जितसँगै जर्मनी नकआउट चरणमा प्रवेश गर्दै ६ अंक जोड्न सफल भएको छ ।
