- ३१ भाद्र २०८३, बुधबार / Sep 16, 2026
काठमाडौँ, १० कार्तिक। चालू आर्थिक वर्ष २०८२/८३ को पहिलो तीन महिनामा नेपालको अन्तर्राष्ट्रिय व्यापारमा उल्लेखनीय वृद्धि भएको छ। भन्सार विभागले सार्वजनिक गरेको तथ्याङ्कअनुसार, साउन, भदौ र असोज महिनामा नेपालले ५ खर्ब ४० अर्ब ८६ करोड रुपैयाँ बराबरको अन्तर्राष्ट्रिय व्यापार गरेको छ।
यो अघिल्लो आर्थिक वर्षको सोही अवधिको तुलनामा २६.०४ प्रतिशतले वृद्धि भएको हो। गएको आर्थिक वर्षको पहिलो त्रैमासमा ४ खर्ब २९ अर्ब १३ करोड रुपैयाँ बराबरको व्यापार भएको थियो। चाडपर्वको सिजनका कारण यस वर्ष आयात र निर्यात दुवै बढेको विभागले जनाएको छ।
यस अवधिमा चार खर्ब ६८ अर्ब रुपैयाँ बराबरको वस्तु आयात गरिएको छ, जुन अघिल्लो वर्षको तुलनामा १९.७९ प्रतिशतले बढी हो।
त्यस्तै, ७२ अर्ब ७८ करोड रुपैयाँ बराबरको निर्यात भएको छ, जुन अघिल्लो वर्षको तुलनामा ८९.६४ प्रतिशतले वृद्धि हो।
यद्यपि, व्यापारमा वृद्धि भए पनि व्यापार घाटा अझै उच्च रहेको विभागले जनाएको छ। चालू आर्थिक वर्षको पहिलो तीन महिनामा तीन खर्ब ९५ अर्ब ३० करोड रुपैयाँ बराबरको व्यापार घाटा भएको छ।
