- ३० चैत्र २०८२, सोमबार / Apr 13, 2026
बारा, ५ फागुन । जेनजी आन्दोलनका क्रममा भीमफेदी कारागार तोडेर फरार भएका एक कैदी बारामा पुनः चोरी गर्दै गर्दा पक्राउ परेका छन् ।
प्रसौनी गाउँपालिका–१ निवासी २६ वर्षीय विशाल मुखियालाई इलाका प्रहरी कार्यालय प्रसौनीबाट खटिएको टोलीले फागुन ४ गते रङ्गेहात पक्राउ गरेको हो । उनी प्रसौनीस्थित विश्वकर्मा मेटल इन्डस्ट्रिजबाट तामाको तार चोरी गरिरहेको अवस्थामा फेला परेका थिए ।
पक्राउ परेका मुखिया यसअघि गम्भीर अपराधमा सजाय काटिरहेका व्यक्ति हुन् । उनलाई मकवानपुर जिल्ला अदालत ले किर्ते र डाका मुद्दामा ५ वर्ष ६ महिना कैद तथा १ लाख रुपैयाँ जरिवानाको फैसला सुनाएको थियो ।
सोही सजाय भुक्तानका लागि कारागारमा रहेका उनी २०८२ भदौ २४ गते कारागार तोडेर फरार भएका थिए । लामो समयदेखि प्रहरीको खोजी सूचीमा रहेका मुखिया पुनः चोरी कार्यमा संलग्न अवस्थामा फेला परेपछि हाल बारा जिल्ला अदालत बाट चोरी मुद्दामा सात दिनको म्याद थप गरी अनुसन्धान भइरहेको छ ।
जिल्ला प्रहरी कार्यालय बाराका प्रवक्ता एवं प्रहरी नायब उपरीक्षक विजयराज पण्डितका अनुसार फरार कैदीले पुनः अपराध गरेको देखिएकाले थप कानुनी प्रक्रिया अघि बढाइएको छ ।
