- २९ भाद्र २०८३, सोमबार / Sep 14, 2026
१४ हजार ३७६ कर्मचारी मतदानमा खटिने
२ हजार ३९६ मतदान केन्द्र
१८ लाख ७० हजार ६५ मतदाता
२ लाख ७ हजार ८१९ नयाँ मतदाता थपिए
१८ प्रतिनिधिसभा निर्वाचन क्षेत्र
गण्डकी प्रदेश । यही फागुन २१ गते हुने प्रतिनिधिसभा सदस्य निर्वाचनका लागि गण्डकी प्रदेशमा १४ हजारभन्दा बढी कर्मचारी परिचालन गरिने भएको छ ।
प्रदेश निर्वाचन कार्यालय पोखराका सूचना अधिकारी रुद्रप्रसाद न्यौपानेका अनुसार प्रदेशका ११ जिल्लामा रहेका २ हजार ३९६ मतदान केन्द्रमा छ जनाका दरले १४ हजार ३७६ जना कर्मचारी खटिनेछन् ।
प्रत्येक मतदान केन्द्रमा एक जना मतदान अधिकृत, एक जना सहायक मतदान अधिकृत, तीन जना सहायक कर्मचारी, एक जना कार्यालय सहयोगी तथा तीन जना स्वयंसेवक परिचालन गरिनेछ । मुख्य निर्वाचन अधिकृतको कार्यालयमार्फत कर्मचारी व्यवस्थापनको काम भइरहेको छ । छनोट भएका कर्मचारीलाई तालिम दिएर मतदान केन्द्रमा पठाइने जनाइएको छ ।
गण्डकी प्रदेशका ११ वटै जिल्लामा गरी १ हजार २९७ मतदानस्थल र २ हजार ३९६ मतदान केन्द्र रहेका छन् । प्रदेशमा कुल १८ लाख ७० हजार ६५ मतदाता रहेका छन् ।
सबैभन्दा बढी मतदाता कास्कीमा ३ लाख ८ हजार ५७२ छन् भने सबैभन्दा कम मनाङमा ७ हजार छन् । स्याङ्जामा २ लाख ४८ हजार ८१६, तनहुँमा २ लाख ५४ हजार ३९७, नवलपुरमा २ लाख ६८ हजार ५२६, गोर्खामा २ लाख २९ हजार ५८ र बागलुङमा १ लाख ९३ हजार १८१ मतदाता रहेका छन् ।
त्यस्तै, लमजुङमा १ लाख ३७ हजार १२४, पर्वतमा १ लाख २५ हजार ४६६, म्याग्दीमा ८६ हजार ३९७ र मुस्ताङमा ११ हजार ३३८ मतदाता रहेका छन् । प्रदेशका कुल मतदातामध्ये ९ लाख १४ हजार ५३५ पुरुष, ९ लाख ५५ हजार ५१६ महिला र १४ जना अन्य छन् ।
वि.सं. २०७९ को प्रतिनिधिसभा सदस्य निर्वाचनमा गण्डकी प्रदेशमा १६ लाख ६२ हजार २४६ मतदाता रहेका थिए । यसपटक २ लाख ७ हजार ८१९ नयाँ मतदाता थपिएका छन् । प्रदेशमा १८ प्रतिनिधिसभा सदस्य निर्वाचन क्षेत्र रहेका छन् ।
