अविरल वर्षाले बीपी राजमार्गका धेरै स्थानमा पहिरो, आवागमन पूर्णरूपमा ठप्प

काठमाडौँ, १४ कार्तिक । बिहीबारदेखि लगातार परिरहेको वर्षाले बीपी राजमार्ग पूर्णरूपमा अवरुद्ध भएको छ । अविरल वर्षासँगै आएको पहिरो र लेदोका कारण सडक दुबै तर्फ बन्द भएको जिल्ला प्रहरी कार्यालय काभ्रेपलाञ्चोकले जनाएको छ ।

प्रहरी नायब उपरीक्षक रबिन बिष्टका अनुसार राजमार्गको चौकीडाँडा, चार सय बेसी, डालाबेसी, बिरुवा डाँडा, बोक्सीकुना र नार्केललगायतका स्थानमा पहिरो खसेको छ । ती स्थानहरूमा सडकमा बाक्लो लेदो र माटोका कारण सवारी आवागमन ठप्प भएको हो ।

प्रहरीका अनुसार पहिरो पन्छाउने र सडक सञ्चालनमा ल्याउने काम जारी छ तर लगातारको वर्षाका कारण सहज बनाउन केही समय लाग्ने देखिएको छ । स्थानीय बासिन्दा र यात्रुहरूलाई अत्यावश्यकबाहेक यात्रामा ननिस्कन आग्रह गरिएको छ ।