- ६ भाद्र २०८३, शनिबार / Aug 22, 2026
काभ्रे, ६ बैशाख । वर्षासँगै आएको बाढीका कारण बीपी राजमार्ग अन्तर्गत काभ्रेको नमोबुद्ध स्थित कटुञ्जे–रोशीको मङ्गलटार सडकखण्ड बिहानदेखि पूर्ण रूपमा अवरुद्ध भएको छ ।
जिल्ला प्रहरी कार्यालय काभ्रेका अनुसार कटुञ्जे–मङ्गलटार खण्डका विभिन्न स्थानमा निर्माण गरिएका अस्थायी डाइभर्सन बाढीले बगाएपछि सवारी आवागमन रोकिएको हो । डाइभर्सन मर्मत कार्य सुरु गरिएको भए पनि यातायात सुचारु हुन केही समय लाग्ने सूचना अधिकारी डीएसपी रविन विष्ट ले जानकारी दिएका छन् ।
प्रहरीका अनुसार लगातारको वर्षाले रोशी खोला मा पानीको बहाव बढेपछि यसअघि बनाइएका अस्थायी संरचना बगाएको हो । गत वर्ष आएको बाढीपहिरोले काभ्रेको रोशीदेखि सिन्धुलीको नेपालथोक क्षेत्रसम्म करिब १८ किलोमिटर सडक क्षतिग्रस्त बनाएको थियो । त्यसपछि अस्थायी डाइभर्सनमार्फत यातायात सञ्चालन हुँदै आएको थियो । यस्तै गत चैत महिनामा पनि सोही क्षेत्रमा करिब ४ किलोमिटर सडक पुनः बगाएपछि अस्थायी संरचना बनाइएको थियो ।
राजमार्ग अवरुद्ध भएसँगै सवारीसाधनलाई काभ्रेको धुलिखेल स्थित काभ्रेभञ्ज्याङ र सिन्धुलीको नेपालथोक क्षेत्रमा रोकिएको छ । प्रहरीले सर्वसाधारणलाई सडकको अवस्था बुझेर मात्र यात्रा गर्न तथा अर्को सूचना जारी नभएसम्म उक्त खण्ड प्रयोग नगर्न अनुरोध गरेको छ ।
यसअघि असोज महिनाको बाढीपहिरोले चौकीडाँडा–नेपालथोक सडकखण्ड पूर्ण रूपमा क्षतिग्रस्त बनाएपछि खोलामार्गमै अस्थायी सडक बनाएर यातायात सञ्चालन गरिँदै आएको थियो । हाल स्थायी सडक निर्माण कार्य डिभिजन सडक कार्यालय भक्तपुर मार्फत अघि बढिरहेको जनाइएको छ ।
