- २२ श्रावण २०८३, शुक्रबार / Aug 7, 2026
काठमाडौं, ४ जेठ । केन्द्रीय कारागारबाट फरार भएकी सपना तामाङलाई प्रहरीले काठमाडौंको असनस्थित बाँगेमुढाबाट पक्राउ गरेको छ। उनलाई आइतबार राति काठमाडौं उपत्यका अपराध अनुसन्धान कार्यालयको टोलीले नियन्त्रणमा लिएको हो।
अपहरण, हत्या तथा डकैती मुद्दामा अदालतबाट २५ वर्ष कैद सजाय तोकिएकी २५ वर्षीया तामाङ शुक्रबार केन्द्रीय कारागारको पर्खाल नाघेर फरार भएकी थिइन्। उनी फरार भएको घटना करिब १२ घण्टापछि मात्रै जेल प्रशासनलाई थाहा भएको बताइएको छ।
घटनापछि कारागार प्रशासनले जेल सुरक्षा कमजोरीबारे अनुसन्धान गर्न छानबिन समिति समेत गठन गरेको छ। तामाङलाई भगाउन सहयोग गरेको आरोपमा भोजपुर घर भएका २६ वर्षीय साजन श्रेष्ठलाई पनि प्रहरीले पक्राउ गरेको छ।
काठमाडौं उपत्यका अपराध अनुसन्धान कार्यालयका एसएसपी सन्तोष खड्काका अनुसार प्रारम्भिक अनुसन्धानमा श्रेष्ठ र तामाङबीच प्रेम सम्बन्ध रहेको खुलेको छ। प्रहरी स्रोतका अनुसार श्रेष्ठकी आमा यसअघि केन्द्रीय कारागारमा कैद भुक्तान गरिरहेकी थिइन्। आमालाई भेट्न आउने क्रममा श्रेष्ठ र तामाङबीच चिनजान भएको र पछि प्रेम सम्बन्धमा परिणत भएको खुलेको छ।
प्रहरीका अनुसार उनीहरूले पूर्वयोजनाअनुसार कारागारबाट भाग्ने योजना बनाएका थिए। तामाङ पर्खाल नाघेर बाहिरिएपछि श्रेष्ठले मोटरसाइकलमा राखेर फरार गराएको अनुसन्धानबाट खुलेको छ।
