- ६ कार्तिक २०८३, शुक्रबार / Oct 23, 2026
काठमाडौं, ४ जेठ । अमेरिकी राष्ट्रपति डोनाल्ड ट्रम्पले इरानलाई समय घर्किँदै गएको भन्दै कडा चेतावनी दिएका छन्। उनले आफ्नो सामाजिक सञ्जाल ‘ट्रुथ सोसल’मार्फत इरानलाई छिटो निर्णय लिन आग्रह गर्दै ढिलाइ गरे परिणाम गम्भीर हुने संकेत गरेका हुन्।
ट्रम्पले लेखेका छन्, “उनीहरू छिटो अघि बढ्नु राम्रो हुन्छ, नत्र उनीहरूको लागि केही पनि बाँकी रहने छैन। हरेक कुराको एउटा समय सीमा हुन्छ।”
उनको पछिल्लो अभिव्यक्तिलाई अमेरिका र इरानबीच जारी तनाव तथा युद्धविराम सम्बन्धी वार्तासँग जोडेर हेरिएको छ। ट्रम्पले अमेरिकाले अघि सारेको प्रस्तावमा सहमत हुन इरानमाथि दबाब सिर्जना गर्ने प्रयास गरेको विश्लेषण गरिएको छ।
उता, इरानी सञ्चारमाध्यमहरूले भने द्वन्द्व अन्त्यका लागि तेहरानले प्रस्तुत गरेको पछिल्लो प्रस्तावप्रति अमेरिकाले सकारात्मक प्रतिक्रिया नदिएको आरोप लगाएका छन्। गत अप्रिलको सुरुवातमा युद्धविराम घोषणा हुनुअघि पनि ट्रम्पले इरान सम्झौतामा सहमत नभए “सभ्यता नै समाप्त हुने” चेतावनी दिएका थिए।
यसै साताको सुरुमा समेत उनले तेहरानका मागहरू पूर्ण रूपमा अस्वीकार्य रहेको उल्लेख गर्दै युद्धविराम गम्भीर संकटमा रहेको बताएका थिए। अमेरिका र इरानबीचको मुख्य विवादको केन्द्र इरानको आणविक कार्यक्रम बनेको छ।
यद्यपि, ट्रम्पले शुक्रबार इरानले आफ्नो आणविक कार्यक्रम २० वर्षका लागि स्थगित गर्न सहमत भए आफू त्यसलाई स्वीकार गर्न तयार रहेको संकेत दिएका छन्। यसलाई उनले यसअघि राख्दै आएको “पूर्ण रूपमा आणविक कार्यक्रम बन्द गर्नुपर्ने” अडानबाट केही पछि हटेको रूपमा हेरिएको छ।
