- २१ श्रावण २०८३, बिहीबार / Aug 6, 2026
काठमाण्डौ । सधैं भिडभाड र व्यस्त रहने काठमाण्डौ उपत्यका दशैँ पर्वको कारण सुनसान बन्दै गएको छ। गाडीको चापले अस्तव्यस्त देखिने चोक र गल्लीहरू अहिले शून्यजस्तै देखिन थालेका छन्।
भोलि दशैँको टीका भएकाले उपत्यकामा अझै चहलपहल घटेको बुझ्न सकिन्छ। पसलहरू पनि पूर्ण रूपमा खुलेका छैनन् भने केही मुख्य चोकमा मात्रै सामान्य गतिविधि देखिएको छ।
देशका विभिन्न जिल्लाबाट रोजगारी, व्यवसाय वा अध्ययनका लागि राजधानी बस्नेहरू वर्षमा एकपटक दशैँमा घर फर्कने गर्छन्। यस वर्ष पनि दशैँ मनाउन राजधानी छाड्नेको संख्यामा वृद्धि भएको छ।
ट्राफिक प्रहरीका अनुसार अहिले गाडीको चापमा झन्डै ५० प्रतिशतले कमी आएको छ। सार्वजनिक यातायात आंशिक रूपमा चलिरहेका छन्।
अहिलेसम्म करिब साढे पाँच लाख मानिसले काठमाण्डौ उपत्यका छाडेको अनुमान गरिएको छ।
