- ३० श्रावण २०८३, शनिबार / Aug 15, 2026
काठमाडौं, १३ असोज । दशैं, तिहार र छठजस्ता ठूला चाडपर्वको बेलामा पनि शिक्षकहरूले पालिकाबाट तलब नपाएको गुनासो बढेपछि शिक्षा, विज्ञान तथा प्रविधि मन्त्री महावीर पुनले यसबारे औपचारिक अनुसन्धान सुरु गरेका छन् ।
मन्त्री पुनका अनुसार शिक्षा मन्त्रालयले पालिकाहरुलाई शिक्षक तथा कर्मचारीको तलब उपलब्ध गराउन आवश्यक रकम पठाइसके पनि धेरै पालिकाले ढिलासुस्ती गरेका छन् र विभिन्न बहाना देखाएर तलब नखुवाएको देखिएको छ । उनले भने, ‘शिक्षा मन्त्रालयले सबै पालिकाहरुलाई पैसा पठाइसकेकाे छ, तर तलब समयमै वितरण भएन । यस्तो बेथिति किन भयो भन्नेबारे अनुसन्धान गर्दैछु र यसको दीर्घकालीन समाधानका उपाय खोज्दैछु ।’
शिक्षक तथा कर्मचारीहरूले तलब नपाएको विषयमा मन्त्री पुनलाई हालसम्म फोन र इमेलमार्फत ५०० भन्दा बढी गुनासो आएको छ । तीमध्ये सबैभन्दा धेरै गुनासो मधेश प्रदेशका शिक्षक तथा कर्मचारीबाट आएको उनले बताए ।
उनले सामाजिक सञ्जालमार्फत प्रतिक्रिया जनाउँदै भनेका छन्, ‘मलाई सबैभन्दा धेरै फोन मधेशबाट आएको छ । वर्षदिनमा एकपटक आउने दशैं, तिहार र छठ जस्ता महान चाडवाडकै समयमा पालिकाले ढिलासुस्ती र अनेक बहाना देखाएर तलब नखुवाएको विषयमा म गम्भीर छु ।’
यसअघि पनि मन्त्री पुनले पालिकाहरुलाई शिक्षक र कर्मचारीले पाउनुपर्ने तलब समयमै उपलब्ध गराउन निर्देशन दिएका थिए । तर गुनासो बढ्दै गएपछि उनले प्रत्यक्ष अनुसन्धान प्रक्रिया अघि बढाएका हुन् । अब मन्त्रालयले तथ्य संकलन गरी पालिकाको कामकारबाहीप्रति आवश्यक कदम चाल्ने तयारी गरेको छ ।
मन्त्री पुनले यस घटनालाई शिक्षा क्षेत्रमै गम्भीर चुनौतीका रूपमा लिँदै भविष्यमा यस्ता समस्या दोहोरिन नदिन कडा कदम चालिने चेतावनी दिएका छन् ।
