- २९ भाद्र २०८३, सोमबार / Sep 14, 2026
काठमाडौँ, ५ फागुन । मेडिकल व्यवसायी तथा ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’का संयोजक दुर्गा प्रसाईंलाई प्रहरीले सार्वजनिक शान्ति विरुद्धको कसुरमा अनुसन्धान गर्ने भएको छ । प्रसाईंलाई सोमबार साँझ भक्तपुरबाट पक्राउ गरिएको हो ।
जिल्ला प्रहरी परिसर काठमाडौँका एसपी पवन भट्टराईका अनुसार प्रसाईंविरुद्ध सार्वजनिक शान्ति विरुद्धको कसुरमा जिल्ला प्रशासन कार्यालयबाट म्याद थप गरेर अनुसन्धान अघि बढाइने छ । साथै, झुटा अफवाह फैलाएको आरोपमा समेत अनुसन्धान गरिने प्रहरीले जनाएको छ ।
प्रसाईंले सरकारसँग भएको सम्झौता कार्यान्वयन नभए अनिश्चितकालीन बन्दको घोषणा गर्ने तथा चुनाव हुन नदिने अभिव्यक्ति दिँदै आएका थिए । सोही अभिव्यक्तिलाई आधार मानेर प्रहरीले अनुसन्धान प्रक्रिया अघि बढाएको जनाएको छ ।
यसअघि पनि प्रसाईं माघ २३ गते पक्राउ परेर हाजिर जमानीमा छुटेका थिए । त्यसबेला निर्वाचनसम्बन्धी अभिव्यक्तिलाई आधार बनाएर प्रहरीको साइबर ब्युरोले बयान लिएपछि उनलाई रिहा गरिएको थियो । माघ ५ गते पोखराबाट पक्राउ परे पनि उनी त्यसपछि छुटेका थिए । प्रहरीले घटनाबारे थप अनुसन्धान जारी रहेको जनाएको छ ।
